Bəzən münasibətdə hər şey qaydasında olur. Oğlan diqqətlidir, yazır, maraqlanır, gələcəkdən danışır, özünü sevən biri kimi aparır. Amma sonra bir gün sanki tamam başqa adama çevrilir. Əhvalı tez-tez dəyişir, kobud danışır, əsəbi olur, səbəbsiz yerə uzaqlaşır, münasibəti bitirmək istəyirmiş kimi davranır. Qız da başlayır özünü sorğu-suala çəkməyə: “Məndən soyuyub?”, “Başqası var?”, “Mən nəyi səhv etdim?” Halbuki bəzən problem nə sevgidə olur, nə də səndə. Problem onun gizlətdiyi həyatda olur. Və bu gizli həyatın adı çox vaxt mərc, qumar və ludomaniya olur.
Mərc asılılığı olan kişi bir müddət hər şeyi gizlədə bilir. Uduzur, yenə oynayır. Borca düşür, gizlədir. İçində panika böyüyür, amma bunu etiraf etmək əvəzinə davranışı dəyişir. Ona görə də birdən-birə kobudlaşır, əvvəlki mehribanlığını itirir, ən xırda sözə görə aqressiya göstərir. Çünki daxilində sakitlik qalmır. O, artıq sadəcə münasibəti yox, uduzduğu pulu, verdiyi borc sözlərini, gizlətdiyi həqiqətləri və batdığı bataqlığı da daşıyır. Bunu da çox vaxt ən yaxın insana, yəni sevgilisinə hiss etdirir. Qız elə bilir ki, oğlanın ürəyi dəyişib. Əslində isə beynini qorxu, borc və asılılıq yeyir.
Belə kişilər bəzən depressiyaya düşmüş kimi görünür. Susurlar, donuqlaşırlar, heç nəyə həvəs göstərmirlər, sonra da qəfil “ayrılmaq yaxşıdır”, “mən sənə uyğun deyiləm”, “məndən sənə xeyir gəlməz” kimi cümlələr qururlar. Bu sözlər kənardan vicdanlı etiraf kimi görünə bilər, amma çox vaxt arxasında gizli dağılma olur. Çünki artıq münasibəti davam etdirmək üçün nə psixoloji gücləri qalır, nə də dürüst olmağa cəsarətləri. Onlar tutulmaqdan qorxurlar, həqiqətin açılacağından qorxurlar, sevgililərinin nə vaxtsa hər şeyi biləcəyindən qorxurlar. Və bu qorxu onları ya kobudlaşdırır, ya susdurur, ya da münasibəti öz əlləri ilə dağıtmağa aparır.
Qızların bilməli olduğu ən vacib şey budur: münasibətdə hər şey normal gedərkən birdən-birə bu qədər sərt dəyişən kişi həmişə “sadəcə soyuyan” adam olmur. Əgər o, telefona həddindən artıq bağlanırsa, pul mövzusunda qapanırsa, gah çox gərgin, gah da qəribə dərəcədə ümidli görünürsə, tez əsəbiləşirsə, verdiyi sözləri tutmursa, səbəbsiz yerə uzaqlaşırsa və münasibəti qırmağa çalışırsa, burada gizli mərc asılılığı ehtimalı çox böyükdür. Belə halda özünü günahlandırmaq ən böyük səhvdir. Çünki bəzən oğlanın dəyişməsi sənin dəyərinin azalması yox, onun içində böyüyən bir asılılığın üzə çıxmasıdır. Sevgi hər şeyi düzəltmir. Bəzən sevgi olan yerdə də qumar insanı içəridən çürüdür, sonra da o çürümə münasibətə yayılır. Ona görə belə dəyişiklik görəndə təkcə “məni sevir, ya yox?” sualını vermək yox, “bu insan nəyi gizlədir?” sualını da vermək lazımdır.
Bunlar da maraqlıdır
