Qadın tennisi tarixində elə idmançılar var ki, qazandıqları kuboklardan daha çox yaratdıqları imiclə yadda qalıblar. Anna Kurnikova (Анна Курникова – Anna Kournikova) məhz belə fenomenlərdən biridir. O, heç vaxt WTA turnirlərində tək oyunlar üzrə çempion ola bilmədi, “Böyük Dəbilqə” turnirində fərdi titul qazanmadı, lakin buna baxmayaraq dünyanın ən tanınmış tennisçilərindən birinə çevrildi. 1990-cı illərin sonu və 2000-ci illərin əvvəllərində Kurnikova təkcə tennis meydançalarının deyil, həm də moda jurnallarının, reklam kampaniyalarının və televiziya proqramlarının ən çox axtarılan siması idi. Bir çox idman tarixçisi onu qadın tennisinin ilk qlobal s_eks-simvolu adlandırır.
Moskvadan dünya səhnəsinə
Anna Kurnikova 7 iyun 1981-ci ildə SSRİ-nin Moskva şəhərində anadan olub. Atası Sergey Kurnikov keçmiş yunan-Roma güləşi üzrə idmançı, anası Alla Kurnikova isə qaçış müəllimi idi. İdman ailəsində böyüyən Anna beş yaşında ilk dəfə raket götürdü və qısa müddətdə qeyri-adi istedadı ilə seçildi. On yaşında ABŞ-ın məşhur Nick Bollettieri Tennis Akademiyasına dəvət aldı. Bu, onun həyatını dəyişən dönüş nöqtəsi oldu.
Karyerasından çox gözəlliyi danışılırdı
Kurnikova cəmi 16 yaşında Wimbledon yarımfinalına yüksəldikdə bütün dünya onun adını öyrəndi. Sonradan dünya reytinqində 8-ci pilləyədək yüksəldi. Tək oyunlarda titul qazana bilməsə də, Martina Hingis ilə birlikdə qoşa oyunlarda böyük uğurlar əldə etdi. Cütlük iki dəfə Australian Open çempionu oldu və Anna qoşa oyunlarda dünya reytinqinin bir nömrəsinə qədər yüksəldi.
Lakin maraqlıdır ki, ictimaiyyət onun forehendindən və ya servisindən daha çox zahiri görünüşündən danışırdı. Sarı saçları, fotogenik siması və kamera qarşısındakı rahat davranışı onu qısa müddətdə pop mədəniyyətinin simasına çevirdi. Bir çox jurnal onu “planetin ən cazibədar idmançısı” elan edir, fotoları isə dünyanın ən məşhur kişi jurnallarının üz qabığını bəzəyirdi. Hətta tennisi izləməyən milyonlarla insan belə Anna Kurnikovanın adını tanıyırdı.
Reklam müqavilələri onu milyonçu etdi
Anna Kurnikovanın fenomen olmasının əsas səbəblərindən biri də reklam bazarında yaratdığı inqilab idi. O, Adidas, Berlei, Omega, Yonex, Omega saatları, Lycos, Canon və onlarla başqa dünya brendi ilə milyonlarla dollarlıq müqavilələr bağladı. Mütəxəssislər hesab edirlər ki, o, karyerasının ən parlaq dövründə tennisdən qazandığından qat-qat çox pulu reklam layihələrindən əldə edirdi. Hətta cəmi 18 yaşında olarkən reklam gəlirlərinin on milyonlarla dollar olduğu bildirilirdi.
İdman marketinqi üzrə ekspertlər Kurnikovanı qadın idmanında kommersiya dövrünün başlanğıcını sürətləndirən simalardan biri hesab edirlər. Ondan sonra Mariya Şarapova, Ana İvanoviç və Yevgeniya Buşar kimi tennisçilər də oxşar reklam modelindən istifadə etdilər.
Şəxsi həyatı həmişə maraq mərkəzində olub
Anna Kurnikovanın şəxsi həyatı da illərlə medianın əsas mövzularından biri olub. 2001-ci ildə o, ispan müğənni Enrike İqlesiasın “Escape” klipinin çəkilişində iştirak etdi. Elə həmin çəkilişdə başlayan tanışlıq sonradan dünya şou-biznesinin ən uzunömürlü münasibətlərindən birinə çevrildi.
Cütlük illərlə evlənib-evlənməmələri barədə yayılan xəbərlərə münasibət bildirmədi və şəxsi həyatlarını maksimum dərəcədə mediadan uzaq saxladı. Məhz bu sirli münasibət onların populyarlığını daha da artırdı.
Dörd uşaq anasıdır
Uzun illər uşaq sahibi olmaq istəmədikləri barədə şayiələr yayılsa da, 2017-ci ildə Anna və Enrikenin əkiz övladları – Lüsi və Nikolas dünyaya gəldi. 2020-ci ildə ailəyə Meri adlı qızları qoşuldu. 2025-ci ilin sonunda isə cütlüyün dördüncü övladı – Romeo adlı oğlu dünyaya gəldi. Maraqlıdır ki, onlar uşaqlarını uzun müddət mediadan gizli saxlasalar da, son illərdə ailə fotolarını nadir hallarda sosial şəbəkələrdə paylaşmağa başlayıblar.
Azarkeşlər onu necə xatırlayırlar?
Tennis forumlarında və sosial şəbəkələrdə Anna Kurnikova haqqında yazılan rəylər demək olar ki, eyni fikirdə birləşir. Bir çox azarkeş onu “tennis tarixinin ən məşhur siması”, “kortların ən böyük s_eks-simvolu” və “qadın tennisini milyonlarla yeni izləyici ilə tanış edən idmançı” adlandırır. Digərləri isə qeyd edirlər ki, əgər davamlı bel və onurğa zədələri olmasaydı, o, tək oyunlarda da “Böyük Dəbilqə” tituluna sahib ola bilərdi. Reddit və digər tennis icmalarında tez-tez “90-cı illərin sonunda tennisə məhz Anna Kurnikovaya görə baxmağa başladıq” kimi fikirlərə rast gəlinir.
Erkən bitən karyera, bitməyən şöhrət
Daimi bel və onurğa problemləri səbəbindən Anna Kurnikova cəmi 22 yaşında peşəkar tennisdən ayrıldı. Bu, çoxları üçün gözlənilməz qərar idi. Lakin idmandan getməsi onun məşhurluğunu azaltmadı. O, uzun illər televiziya layihələrində, xeyriyyə tədbirlərində və reklam kampaniyalarında iştirak etdi, daha sonra isə diqqətini tamamilə ailəsinə yönəltdi.
Bu gün Anna Kurnikova tennis tarixində ən çox kubok qazanan oyunçulardan biri kimi deyil, idmançının necə qlobal brendə çevrilə biləcəyinin ən uğurlu nümunələrindən biri kimi xatırlanır. Onun adı hələ də gözəllik, populyarlıq və idman marketinqi sahəsində uğurlu kommersiya modelinin simvolu hesab olunur.
Bunlar da maraqlıdır
