Son illərdə qadın futbolunda elə bir ad var ki, onu həm məşqçilər, həm futbolçular, həm də azarkeşlər xüsusi hörmətlə çəkirlər. Bu ad Aytana Bonmatidir (Aitana Bonmatí). İspaniyalı yarımmüdafiəçi texniki bacarığı, futbol zəkası və liderlik keyfiyyətləri ilə təkcə “Barselona”nın deyil, dünya futbolunun simvoluna çevrilib. Ardıcıl qazandığı “Qızıl top” mükafatları və klub səviyyəsində əldə etdiyi uğurlar onu qadın futbol tarixinin ən böyük oyunçularından biri kimi tanıdır.
Aytana Bonmati 18 yanvar 1998-ci ildə İspaniyanın Kataloniya bölgəsində yerləşən Vilanova-i-la-Jeltru şəhərində anadan olub. Milliyyətcə ispaniyalıdır, etnik mənsubiyyəti isə katalandır. Atası Visent Konka, anası Roza Bonmati hər ikisi Katalan dili və ədəbiyyatı müəllimidir. Ailədə kitaba, təhsilə və azad düşüncəyə böyük önəm verilməsi Aytananın xarakterinin formalaşmasında mühüm rol oynayıb. O, dəfələrlə bildirib ki, uşaqlıqdan valideynləri ona yalnız futbol oynamağı deyil, düşünməyi, oxumağı və daim öz üzərində işləməyi öyrədiblər.
Maraqlıdır ki, Aytana əvvəlcə basketbolla maraqlanırdı. Lakin məktəbdə oğlanlarla futbol oynamağa başladıqdan sonra bu idman növünə vuruldu. Yeddi yaşından etibarən futbol onun həyatının ayrılmaz hissəsinə çevrildi. On üç yaşında isə “Barselona”nın məşhur “La Masia” akademiyasına qəbul olundu. O dövrdə qızlar üçün internat olmadığından Aytana hər məşq üçün atası ilə birlikdə ictimai nəqliyyat vasitəsilə təxminən iki saat yol gedirdi. Bu zəhmət sonradan dünyanın ən uğurlu futbolçularından birinin yetişməsinə səbəb oldu.
Peşəkar karyerası isə əsl nağıla bənzəyir. “Barselona” ilə dəfələrlə İspaniya çempionu olan Bonmati UEFA Qadınlar Çempionlar Liqasını bir neçə dəfə qazanıb, İspaniya milli komandası ilə isə 2023-cü ildə dünya çempionu olub. O, həmçinin üç il ardıcıl “Qızıl top” (Ballon d’Or Féminin) mükafatını qazanan ilk qadın futbolçu kimi tarixə düşüb. Futbol mütəxəssisləri onun oyununu tez-tez Xavi və Andres İnyestanın oyun üslubu ilə müqayisə edirlər. Topa nəzarəti, meydanı görmə qabiliyyəti və dəqiq ötürmələri onu dünyanın ən ağıllı yarımmüdafiəçilərindən birinə çevirib.
Şəxsi həyatı isə karyerasından tam fərqlənir. Aytana Bonmati şəxsi münasibətlərini ictimaiyyətdən uzaq saxlamağa üstünlük verən idmançılardandır. Onun haqqında müxtəlif vaxtlarda fərqli şayiələr yayılsa da, bu günə qədər heç bir sevgili münasibətini rəsmi şəkildə təsdiqləməyib. İspaniya və beynəlxalq mətbuatın yazdığına görə, hazırda Aytana subaydır və bütün diqqətini futbol karyerasına yönəldib.
Müsahibələrinin birində o, şəxsi həyatını mediada müzakirə etməyi sevmədiyini bildirib. Bonmatinin fikrincə, azarkeşlər onun meydandakı çıxışlarını qiymətləndirməli, şəxsi münasibətləri isə yalnız özünə aid məsələ olaraq qalmalıdır. Bu səbəbdən onun sosial şəbəkə hesablarında da şəxsi həyatı ilə bağlı paylaşımlar demək olar ki, yoxdur. Futbolçu boş vaxtını daha çox ailəsi, yaxın dostları və səyahətlə keçirməyə üstünlük verir. O, xüsusilə Vyetnama etdiyi səfərin həyat baxışını dəyişdiyini və fərqli mədəniyyətləri tanımağı çox sevdiyini deyib.
Aytana Bonmatinin ailəsi onun həyatında bu gün də xüsusi yer tutur. Valideynləri hər zaman qızlarının ən böyük dəstəkçiləri olublar. Futbolçu qazandığı fərdi mükafatların arxasında təkcə öz zəhmətini deyil, ailəsinin illərlə göstərdiyi fədakarlığı da gördüyünü bildirir. O, bir dəfə valideynlərinə müraciətlə belə demişdi: “Siz dəyişiklik uğrunda mübarizə apardınız və buna nail oldunuz. Mən də bu mübarizəni və dözümlülüyü qanımda daşıyıram.”
Kortdan və stadiondan kənarda isə Aytana tamamilə fərqli insandır. O, idman elmləri üzrə universitet təhsili alıb, daha sonra idman menecmenti üzrə magistr proqramına başlayıb. Psixoloji hazırlığa böyük önəm verir və 13 yaşından etibarən idman psixoloqu ilə çalışdığını gizlətmir. Onun fikrincə, güclü futbolçu olmaq üçün yalnız fiziki hazırlıq deyil, sağlam psixologiya da vacibdir.
Bu gün Aytana Bonmati yalnız “Barselona”nın və İspaniya millisinin lideri deyil. O, qadın futbolunun inkişafının simvollarından biri hesab olunur. Təvazökarlığı, intizamı və daim özünü inkişaf etdirmək istəyi sayəsində milyonlarla gənc futbolçu üçün nümunəyə çevrilib. Futbol mütəxəssislərinin əksəriyyəti isə hesab edir ki, Aytana Bonmatinin adı artıq qadın futbol tarixinin ən böyük oyunçuları sırasında əbədi yerini tutub.
Bunlar da maraqlıdır
